Rabu, 06 November 2013

BANYU SENDANG BEJI CLAPAR BISA MARASAKE WONG EDAN

Clapar mujudake sawijining desa ing laladan pegunungan kang mlebu ing wewengkon Kecamatan Karanggayam, Kabupaten Kebumen. Ing kana bisa ditemokake sawijining pesareyan yaiku pesareyan Mbah Kepadhangan kang miturut para warga dipercaya minangka cikal bakal dening masyarakat kana. Ing sisih ngisor udakara 200 meteran saka pesareyan ana Sendang Beji kang ora tau asat banyune.

Soegito T pensiunan karyawan Pemkab Kebumen kang uga warga Clapar nate nyritakake menawa Sendhang Beji dhek biyen kanggo nglarung kotak wayang kulit Kyai Gandamaya, lan terbang Si Grantung kagungane Mbah Kepadhangan. Dicritakake menawa Sendang Beji kasebut uga asring digunakake kanggo ngedusi wong edan (wong gemblung). Miturut dheweke ora sithik wong edan sing wis kasil diwarasake sawise didusi ana kana.

Pesareyan Mbah Kepadhangan manggon ana ing Dhukuh Depok ing sisih paling ndhuwur. Ambane pesareyan udakara 350 meter pesagi. Lan Sendhang Beji sing bisa kanggo marasake wong edan kuwi ana ing sisih ngisor. Mbah Kepadhangan uga nduweni sawernaning pusaka  kayata keris dhapur Jalak kang diarani Kyai Wulung, patrem kanthi dhapur lontop kang uga diarni Kyai Lontop, keris dhapur kebo lajer kang diarani Kyai Banjor, tumbak dhapur carang glagah kang diarani Kyai Blabar, umbul-umbul lan bende pengalab-alab. Kaya umume pusaka liyane, nalika wula-wulan tinamtu kaya wulan Sura barang-barang pusaka mau uga dijamasi.

Ing sakupenge pesareyan Mbah Kepadhangan uga tinemu pesareyan Mbah Panembahan Adisan, putra mbarepe Mbah Kepadhangan saka garwa peri saka Segarawindu. Taksih miturut crita saka Soegito T, nalika semana ana kedadeyan, ora kenyana-nyana dumadakan ana ing lawang cungkup leluhur desa Clapar kuwi, ana papan kang ngandhut mawi aksara Jawa. Unine Untung Surapati. Mbok menawa ana sesambungane antarane Mbah Kepadhangan kalawan Untung Surapati?

Ana sumber nerangake nalika dumadi perang antara pasukan Untung Surapati lumawan Kompeni Walanda ing wulan Oktober 1706 ing Pasuruhan, Jawa Timur, sing gugur ana ing palagan dudu Surapati nanging Patih Wirapati sing pancen praupane kaya dene ‘jambe sinigar’ karo Untung Surapati.

Nalika semana Untung Surapati dhewe kasil oncat saka kepungan Komandhan Knol. Menyang ngendi playune, apa bener menyang desa Clapar? Miturut crita Mbah Kepadhangan mbukak laladan kang saiki desa Clapar nalika taun 1701 M. Ana slisih 5 taun kari dumadine perang ing Pasuruhan. Nanging sawise paprangan ing Pasuruhan kuwi, Kumpeni ora bisa kasil nemokake ana ngendi pesareyane Untung Surapati. Apa bener Untung Surapati nyamur laku minangka Mbah Kepadhangan lan banjur manggon ana ing Clapar? Miturut crita uga pusaka-pusaka Mbah Kepadhangan wis akeh ‘ngombe’ getih Kompeni Walanda.

agustiputra@2013
Sumber : IS.com

0 komentar:

Posting Komentar